Recantos da aula

É moi importante organizar a aula de maneira que atraia a atención dos nenos, que respecte as súas necesidades básicas e sobre todo que proporcione seguridade e confianza.

Neste sentido, Sallán (1996), sostén que o espazo educativo é un elemento que permite que a acción educativa estea organizada e, para iso, debemos ter en conta como docentes o espazo físico onde se vai actuar, o tempo do que imos dispoñer para desenvolvela e os recursos, tanto didácticos como materiais, que necesitamos para iniciala.

A organización espacial baseada no modelo dos recantos de xogo ou actividade consiste en dividir a aula en diversos espazos onde se realizan diferentes actividades relacionadas coas necesidades básicas do neno e da nena, isto permítelles recoñecer visualmente as posibilidades de actividade e os materiais de cada recanto.

Na miña aula existen diferentes recantos fixos durante todo o curso e outros que van cambiando segundo o centro de interese ou obxectivos que pretendamos alcanzar.